माघ १९, २०७६
जुनकिरी खबर

प्रदेश मन्त्रालय कानुनविहीन

देश १ को भूमि व्यवस्था, कृषि तथा सहकारी मन्त्रालय मुख्यमन्त्री शेरधन राईको जिम्मेवारीमा छ । बेग्लै मन्त्री नहुँदाको समस्या एकातिर छ भने कानुन नहुँदा काम गर्न कठिनाइ हुने गरेको छ । कानुन नबनेकाले उक्त मन्त्रालय कार्यविधिका भरमा चलिरहेको छ ।

उक्त मन्त्रालयले दुई वर्षमा सहकारी ऐन २०७६ मात्रै निर्माण गरेको छ । त्यसको नियमावली बनेको छैन । कटहरी फलफूल तथा तरकारी थोक बजार सञ्चालनसम्बन्धी नियमावली २०७६ निर्माण गरे पनि कार्यान्वयन हुन सकेको छैन । नियमावली कार्यान्वयन नहुँदा बजारसमेत सञ्चालनमा आउन सकेको छैन ।

एकीकृत रूपमा कृषि व्यवसाय प्रवर्द्धन अनुदान कार्यविधि २०७६ ल्याएर मन्त्रालयको काम सञ्चालन गर्दै आएको छ । उक्त मन्त्रालयका कानुन अधिकृत सेनाबहादुर श्रेष्ठले प्रदेशसभाको आउँदो हिउँदे अधिवेशनमा पेस हुने गरी हालसम्म कुनै कानुन निर्माण नभएको बताए ।