बजेट सार्वजनिकपछि प्रदेश १ का आर्थिक मामिलामन्त्री इन्द्र आङ्बोले चालु आर्थिक वर्ष ८० प्रतिशत बजेट खर्च हुने दाबी गरे। त्यसपछिका सार्वजनिक कार्यक्रममा मुख्यमन्त्री शेरधन राईले पनि ८० प्रतिशत बजेट खर्च हुनेमा ढुक्क रहन आग्रह गर्दै भाषण गरे। चालु आर्थिक वर्ष प्रदेशको पुँजीगत खर्च बढाउन नयाँ आर्थिक वर्ष सुरु हुनुभन्दा डेढ महिना आगावैै बजेट ल्याइ खर्चको अख्तियारी दिने व्यवस्था पनि मिलाइयो।
तर, बजेट ल्याएको ६ महिनामा १६.२७ प्रतिशत मात्रै विकास बजेट खर्च भएको छ। यसै अनुरूप खर्च हुने हो भने मन्त्री र मुख्यमन्त्रीको भाषणमै सीमित हुने देखिएको छ।
प्रदेश १ सरकारले यस आर्थिक वर्षका लागि ४२ अर्ब २० करोड ४ लाख १२ हजार रुपैयाँ विकास बजेट विनियोजन गरेको छ। प्रदेश लेखा नियन्त्रण कार्यालयको तथ्यांकअनुसार यो आर्थिक वर्षको पुस मसान्तसम्म कुल बजेटको १६.२७ प्रतिशत अर्थात् ६ अर्ब ८६ करोड ४८ लाख २७ हजार मात्रै खर्च भएको छ। चालुतर्फ १८ अर्ब ६२ करोड ६४ लाख ७६ हजार मध्ये १२.३३ प्रतिशत अर्थात् २ अर्ब २९ करोड ७५ लाख ३४ हजार मात्र खर्च भएको कार्यालयका सूचना अधिकारी अन्तिम आचार्यले जानकारी दिए।
Copyright © 2019 / 2026 - Junkirikhabar.com All rights reserved
