तीर्थयात्रामा भारत गएका नेपालीको दुर्घटनामा निधन भएपछि सोमबार शब नेपाल ल्याईएको छ ।
इटहरी उपमहानगरपालिका वडा नं. १० का मात्रै ६ जनाको दुर्घटनामा निधन भएको थियो । निधन पछि शोकमा रहेका परिवारले शब बुझ्न नपाउँदा झनै शोकमा डुबेका थिए । सोमबार शब नेपाल ल्याईएसँग इटहरीको गंगा जमुना मुक्ति घाटमा सामुहिक दाहसंस्कार गरिएको छ ।
शव लिन नेकपा इटहरीको नेतृत्वमा बागडोरा एअरपोर्टमा टोली पुगेको थियो । प्रदेश सांसद लिलम बस्नेत, नेकपा इटहरी अध्यक्ष बहादुरसिंह तामाङ (ज्वाला), सचिव काशीनाथ दंगाल लगायत शब लिनका लागि पुगेका थिए । परराष्ट्र मन्त्रालय, दिल्ली स्थित नेपाली दुताबासको सहयोगमा शव नेपाल ल्याइएको उपमेयर लक्ष्मी गौतमले बताईन् । उनका अनुसार अन्य घाईतेको भारतमै उपचार भईरहेको छ ।
माघ २३ गते इटहरीबाट ३५ दिने तीर्थयात्रामा गएका उनीहरुको बुधबार राती दुर्घटनामा मृत्यु भएको हो । दक्षिण भारतीय राज्यको तमिलनाडुको सालेममा को १ ख ५३३४ नम्बरको बस विपरीत दिशाबाट आएको बससँग ठोक्किदा उक्त दुर्घटना भएको हो । दुर्घटनामा मृत्यु हुनेमा एउटै परिवारका तीनजना रहेका छन् । ७० वर्ष पार गरेका रसीलाल चौधरी, उनकी श्रीमती ६८ वर्षकी बुधनी चौधरी र रसिलालकी वहिनी फुलसरी चौधरीको मृत्यु भएको वडा नं. १० का वडाध्यक्ष प्रकाश चौधरीले बताए ।
बस दुर्घटनामा परि इटहरी वडा नं. १० का टीकाराम चौधरी, रसीलाल चौधरी, बुधनी चौधरी, फूलसरी चौधरी, गोपाल तामाङ र बीरबहादुर राईको मृत्यु भएको हो । नयाँ दिल्लीस्थित नेपाली दुतावासका अुनसार उक्त बसमा ३४ जना सवार थिए । विराटनगर–जोगवनी नाका हुँदै भारत तीर्थयात्राका लागि गएका थिए । तीर्थयात्रा गएको १६ औं दिनमा दुर्घटना भएको हो ।
शोक विदा
मंगलबार इटहरीमा सार्वजनिक बिदा दिईएको छ । इटहरी उपमहानगरपालिकाले मङगलबार सार्बजनिक बिदा दिने भएको हो ।
तीर्थयात्राको क्रममा भारत गएका इटहरीका ६ जनाको ज्यान गएकोमा शोक बिदा दिने निर्णय भएको इटहरी उपमहानगरपालिकाले जनाएको छ ।
Copyright © 2019 / 2026 - Junkirikhabar.com All rights reserved
