मानसिकतामा परिवर्तन भएमा मात्र दिगो विकासको लक्ष्यसम्म पुग्न सकिने प्रदेश १ की उपसभामुख सरस्वती पोखरेलले बताएकी छिन् ।
स्वैच्छिक राष्ट्रिय समिक्षा प्रकृया र युवा विषयक कार्यक्रममा बोल्दै उपसभामुखले परिवर्तनको सुरुआत आफैबाट हुनुपर्ने बताइन् ।
सस्टेनेवल डेभलोपमेन्ट गोल अन्तर्गत रिडेफ नेपालको स्थानीय संयोजकत्वमा विभिन्न संघसंस्थाले संयुक्त रुपमा आयोजना गरेको कार्यक्रममा उनले यस्तो बताइन् ।
प्रमुख प्रतिपक्ष दल नेपाली कांग्रेसका प्रमुख सचेतक तथा प्रदेशसभा सदस्य केदार कार्कीले इमान्दारितासाथ काम गर्न सकेमा दिगो विकास हुने बताए ।
प्रौढ शिक्षामा प्राथमिकता दिनुको सट्टा बालशिक्षामा लगानी गर्न सके दिगो विकासको लक्ष्य पुरा हुने उनको भनाइ छ ।
कामका आधारमा गरिने विभेद, शिक्षामा हुने असमानता दिगो विकासको लक्ष्य पुरा गर्न बाधक हुने उनले बताए ।
समाजवादी पार्टी संसदिय दलका नेता तथा प्रदेशसभा सदस्य जयराम यादवले राज्यले नै विभेदको नीति लिएको बताए ।
यादवले संविधानमा नै विभेद रहेको र जुन त्रुटीहरुलाई सच्याउनु आवश्यक रहेको बताए ।
तीन तहकै सरकारबीच सहकार्य भएर अघि बढेमा दिगो विकास अन्तर्गतका लक्ष्य प्राप्ति गर्न सकिने उनको भनाइ छ ।
५ वर्षसम्मको समय बित्दापनि लक्ष्य अनुरुप काम हुन नसकेको उनले बताए ।
प्रदेश योजना आयोग सदस्य पूर्ण कुमार लग्समले दिगो विकासको लक्ष्य प्राप्तिकालागि शिक्षा, पर्यटन, उद्यमशिलता तथा प्राविधिक शिक्षामा प्राथमिकता दिनुपर्ने बताए ।
Copyright © 2019 / 2026 - Junkirikhabar.com All rights reserved
