एक नम्बर प्रदेशका सामाजिक विकासमन्त्री जीवन घिमिरेले कोरोना संक्रमणको त्रास नहटेसम्म हात नमिलाउन आग्रह गरेका छन् । बिहीबारको प्रदेशसभा बैठकमा सांसदहरूको प्रश्नको उत्तर दिँदै मन्त्री घिमिरेले कोरानाको संक्रमण पूर्ण नियन्त्रणमा नभएसम्म एकआपसमा हात नमिलाउन प्रदेशका सबै नागरिकहरूसँग आग्रह गरेका हुन् ।
उनले सार्वजनिक समारोह र स्थलहरूमा जाँदा हात धोएर वा सफा गरेर मात्र जान आम नागरिकहरूलाई आग्रह गरे । उनले भने, ‘कोरोना संक्रमणबाट जोगिन हात नमिलाउन म नागरिकहरूसँग अपिल गर्दछु ।’
मन्त्री घिमिरले कोराना संक्रमणको जोखिम उच्च भएपनि हाहाकारको अवस्था नभएको बताए । उनले कोरानाको बारेमा अतिरञ्जनापूर्ण अभिव्यक्ति दिएर त्रास पैदा गर्ने र कालोबाजारी गर्ने कार्य सरकारले निरुत्साहित गर्छ भने ।
उनले भारतसँग जोडिएका प्रदेशका मुख्य ठूला नाकाहरूमा हेल्पडेस्क राखिएको र उच्च सुरक्षा सर्तकता अपनाइएको भन्दै संसद भवनमा हेण्डवास राखिसकिएको र प्रदेशका सबै कार्यालयहरूमा राख्न निर्देशन दिने संसदमा जानकारी गराए ।
विराटनगर एक नम्बर प्रदेशसभामा मुख्य प्रतिपक्षी दल नेपाली कांग्रेसका प्रमुख सचेतक केदार कार्कीले कोरोना भाइरसको संक्रमणका लागि खाद्यान्न र औषधिको जोहो गर्न प्रदेश सरकारलाई आग्रह गरेका छन् ।
बिहीबार प्रदेशसभा बैठकको विशेषमा बोल्दै प्रमुख सचेतक कार्कीले भारतमा पनि कोरोनाको संक्रमण बढिरहेकाले सीमाना शिल हुने जोखिम बढेको भन्दै समयमै पर्याप्त खाद्यान्न र औषधिको जोहो गर्न सरकारसँग आग्रह गरेका हुन् ।
कोराना संक्रमणले गर्दा चीनतर्फको नाका पहिले नै बन्द भइसकेको र अब भारततर्फको पनि नाका बन्द भएमा देशमा खाद्य र औषधिको संकट पर्ने भएकोले सरकारले विपद व्यवस्थानजमा बेलैमा सचेत हुनुपर्छ भने ।
उनले नेपाल कोरोना भाइरसको उच्च जोखिममा भएकोले सक्रमण सुरु भएमा रोकथाम गर्न असम्भव भएकोले उच्च सर्तकता अपनाउन र विपद व्यवस्थापनमा जोड दिनु उचित हुने बताए ।
Copyright © 2019 / 2026 - Junkirikhabar.com All rights reserved
