महिला अनुयायीमाथि बलात्कार गरेको आरोपमा पक्राउ परेका सिद्धबाबा भनिने कृष्णबहादुर गिरीलाई धरौटीमा छाड्ने आदेश दिएका कारण आलोचित बनेका न्यायाधीशको काज सरुवा भएको छ ।
सिद्धबाबालाई तीन लाख धरौटीमा छाड्ने आदेश दिएका जिल्ला अदालत सुनसरीका न्यायाधीश राधाकृष्ण उप्रेतीको गुल्मी जिल्ला अदालतमा काज सुरुवा भएको हो ।
उनको स्थानमा गुल्मीबाटै अर्जुन कोइराला सुनसरी सरुवा भएका छन् । सरुवा भएका न्यायाधीश कार्यालयमा हाजिर भइनसकेको जिल्ला अदालत सुनसरीका श्रेस्तेदार नगेन्द्रकेसरी पोखरेलले जानकारी दिए ।
९ माघको उच्च अदालतको आदेश पछि फरार भएका गिरी ४० दिनपछि एकसाता अघि जिल्ला अदालत सुनसरीमा हाजिर भएका थिए । हाजिर भएलगतै गिरीलाई उच्च अदालतको आदेश कार्यान्वयनका लागि थुनुवा पूर्जी थमाएर क्षेत्रिय कारागार झुम्कामा पठाएको थियो ।
९ माघमा उच्च अदालत विराटनगरमा मुद्दाको सुनुवाई भइरहेका बेला गिरी अंगरक्षकलाई विराटनगरको सीमावर्ती क्षेत्र रानीमा छाडेर भारत पसेका थिए । गिरी माथि ४ कात्तिकमा महिला अनुयायीलाई आफ्नै कोठासँगै रहेको बैठक कक्षमा बोलाएर करणी गरेको आरोप छ ।
काठमाडौं बस्दै आएकी महिला अनुयायीले उजुरी गरेपछि गिरी मंसिर दोस्रो साता पक्राउ परेका थिए ।
पक्राउ पछि गिरीले प्रहरीको हिरासतमा बस्नुपर्ने समय अवधि विराट नर्सिङहोमबाट नै कटाएका थिए । पक्राउ पर्नु अघि नर्सिङहोम भर्ना भएका गिरी जिल्ला अदालत सुनसरीको आदेशको १४ पुसमा तीन लाख धरौटी बुझाएर छुटेका थिए ।
जिल्लाको आदेश बेरितको भएको दाबी गर्दै सरकारी वकिलको कार्यालय र साधारण तारेख माग्दै गिरी पनि उच्च अदालत विराटनगरमा पुगेका थिए । उच्च अदालतले जिल्लाको आदेश बदर गरेको थियो ।
Copyright © 2019 / 2026 - Junkirikhabar.com All rights reserved
