कोरोना भाइरस सँग लड्न सरकारले मुलुकलाई भरि एक हप्ता सम्म निषेधाज्ञा जस्तै आदेश जारी गरेको छ । सरकारले देशवासीलाई घर बाट बाहिर नजान आदेश जारी गरेपछि अहिले सिङ्गो देशवासी घर भित्रै रहेका छन् ।
घरभित्र रहने र व्यापार व्यवसायहरू बन्द गर्ने सरकारले आदेश दिएपछि अहिले आम नागरिकको घरमा अत्यावश्यक सामाग्रीहरू अभाव हुँदै गएको छ । त्यसैले यति बेला इटहरी र धरानका स्थानीय सरकारले भने निजी क्षेत्रलाई जनताको घरघरमा सामान पुर्याउन संयोजन गर्ने भएको छ ।
इटहरी क्षेत्रभित्र उपमहानगरपालिकाको समन्वय र सहकार्यमा गोरखा डिपार्टमेन्टले खाद्यान्न लगायतको आवश्यक सामग्री घरघरमै लगेर सामान बिक्री गर्ने भएको छ । त्यसैगरि धरान क्षेत्रमा उपमहानगरको संयोजनमा धरानवासीको घरघरमा बराह डिपार्टमेन्ट स्टोर धरान, भाटभटेनी सुरपमार्केट धरान, गोर्खा डिपार्टमेन्ट स्टोर धरान, गुन्द्री डट कम (gudri.com) र सोताङ अर्ग्यानिक कृषि फर्मले सामान पुर्याउने भएको हो ।
कोरोनाको महामारी फैलन नदिन घरैमा बसेका नगरवासीलाई अत्यावश्यक सामाग्री अभाव हुन नदिन कार्यक्रम ल्याइएको इटहरीकी उपप्रमुख लक्ष्मी गौतमले बताइन । लडाउनको समय लम्बिन सक्ने भएकोले बेलैमा सतर्कता अपनाउन खोजिएको हो ।
इटहरीको हकमा गोरखा डिपार्टमेन्ट इटहरी शाखाले सम्पूर्ण वडामा सामाग्री पुर्याउने जिम्मा लिएको छ । सरकारले चैत्र ११ देखि १८ गतेसम्म एक साता लकडाउन घोषणा गरेकोले उपमहानगरको समन्वयमा वडास्तरिय तालिका नै बनाएर सामाग्री पुर्याइने डिपार्टमेन्ट स्टोरले जनाएको छ ।
५०० भन्दा कमको सामाग्री नपुर्याइने र बिहान ९ : ३० देखि दिउँसो ३ बजेसम्म अर्डर गरिसक्नुपर्ने बताइएको छ । डिपार्टमेन्टको हटलाइन नम्बर ९८४२०७९४३३, ९८०३७५११९२ र ९८०१४५४३७९ मा अर्डर टिपाउनुपर्ने र सो सामान ३:३० बजेपछि मात्र घरमा पुग्ने जनाइएको छ ।
Copyright © 2019 / 2026 - Junkirikhabar.com All rights reserved
