लकडाउनको समयमा प्रदेश नम्बर १ मा रगतको अभाव भइरहेका बेला नेपाल रेडक्रस सोसाइटी इटहरी उप शाखा र इटहरी जेसिजको संयुक्त आयोजनामा आइतवार इटहरीमा बृहत्त रक्तदान कार्यक्रम आयोजना गरिएको छ ।
कार्यक्रममा १ सय २२ जनाले रक्तदान गरेको नेपाल रेडक्रस सोसाइटी इटहरी उप शाखा इटहरीका सभापति विमल पौडेलले बताए । कोरोना संक्रमणको महामारी फैलिरहेको संकटपूर्ण अवस्थामा रेडक्रसको आह्रवानमा स्वास्थ्यका हिसाबले सुरक्षा विधि अपनाएर रक्तदान कार्यक्रम गरिएको उनले जनाए ।
रक्तदानमा इटहरी र आसपासका दाताहरुको सहभागीता रहेको थियो । संकलित रगत वीपी कोइराला स्वास्थय विज्ञान प्रतिष्ठान धरानको ब्लड बैंकमा जम्मा गरिने छ ।
अहिले पनि अस्पतालमा यस्ता धेरै बिरामीहरु छन, जसलाई दैनिक रगत चढाउनु पर्ने अवस्था छ । अहिलेको अवस्थामा यसरी दैनिक रुपमा रगतको आवश्यकता पर्ने बिरामीहरुलाई गाह्रो भइरहेको छ ।
आइतवारको रक्तदानले पूर्वमा भईरहेको रगत अभावलाई केही हदसम्म पुरा गर्ने बताइएको छ । कोरोना संक्रमणको महामारी फैलिरहेको अवस्थामा स्वास्थ्यका हिसाबले सुरक्षा विधि अपनाउनुको साथै दुरी कायम गरि रक्तदान गरिएको थियो ।।
Copyright © 2019 / 2026 - Junkirikhabar.com All rights reserved
