प्रदेश १ का जिल्ला समन्वय समितिका प्रमुखहरुले कोरोना परीक्षणको दायरा बढाउनु पर्ने बताएका छन् ।
उनीहरुले र्यापिड डायग्नोष्टिक टेष्ट (आरडिटी) विधिलाई बढाउन माग गरे ।
सामाजिक विकासमन्त्री जीवन घिमिरेसँगको भिडियो कन्फ्रेन्समा प्रमुखहरुले क्वारेन्टाइनमा बसेकाहरुको अनिवार्य आरडिटी गर्न माग गरे ।
१४ दिन क्वारेन्टाइनमा बसेकाहरुलाई आरडिटीको दायरा बढाउन उनीहरुको माग छ । क्वारेन्टाइनमा बसेकाको संख्याको आधारमा किट पठाउन समन्वय समिति प्रमुखहरुले माग गरे ।
इलामका प्रमुख गणेश बरालले जिल्लामा आरडिटी किट अभाव भएको बताए । आरडिटी किट अभावका कारण क्वारेन्टाइनमा बसेकाहरुको परीक्षण गर्न नपाएको उनले गुनासो गरे ।
इलाममा स्वास्थ्यकर्मी र औषधिको पनि अभाव भएको प्रमुख बरालले बताए ।
झापाका प्रमुख सोमनाथ पोर्तेलले आरडिटी किटको अभावमा परीक्षण गर्न नसकिएको बताए । झापामा भारत लगायतका विभिन्न देशबाट ९ सय जना आएको उनको भनाइ छ ।
बाहिरीदेशबाट आएकाहरु अधिकांश होमक्वारेन्टाईनमा रहेकाले उनीहरुको आरडिटी अनिवार्य गर्नुपर्ने उनको माग छ ।
आवस्यक किटको अभावमा परीक्षण हुन नसकेको उनले बताए । बोर्डरको सुरक्षामा कडाई गरिएको प्रमुख पोर्तेलले बताए ।
Copyright © 2019 / 2026 - Junkirikhabar.com All rights reserved
