कोरोना भाइरस (कोभिड–१९) रोकथाम तथा नियन्त्रणका लागि गरिने परीक्षण किटको अभाव हुँदै गएको प्रदेश एकका विभिन्न जिल्ला समन्वय समितिका प्रमुखहरुले गुनासो गरेका छन् ।
विराटनगरस्थित सामाजिक विकास मन्त्री जीवन घिमिरेसँग भिडियो संवाद गर्ने क्रममा उनीहरुले कोरोना परीक्षणको लागि आरडीटीको दायरा बढाउनुपर्ने माग गरेका हुन् ।
विभिन्न जिल्लाको क्वारेन्टाइनमा रहेका सर्वसाधारणको परीक्षण गर्नुपर्ने बताएका उनीहरुले मन्त्रालय समक्ष आरडिटी किट उपलब्ध गराउन माग गरेका छन् ।
सुनसरीमा समेत किटको अभाव हुँदा परीक्षण कार्यलाई गति दिन नसकिएको समितिका प्रमुख गोपालराज भण्डारीले बताएका छन् । दक्षिणी सीमावर्ती क्षेत्रतर्फ उच्च सतर्कता अपनाइएको बताएका भण्डारीले हाल क्वारेन्टाइनमा रहेका सर्वसाधारणको समेत किट अभावका कारण परीक्षणका लागि समस्या भएको उल्लेख गरे ।
समितिका समस्यालाई सम्बोधन गर्दै सामाजिक विकास मन्त्री जीवन घिमिरेले हरेक जिल्लालाई दोस्रो चरणमा ३ सय ६० का दरले किट पठाइसकिएको जानकारी दिए ।
यसैबीच विराटनगरस्थित कोशी अस्पतालमा पीसीआरबाट गरिने थ्रोट स्वाब नमूना परीक्षणका लागि आवश्यक सामाग्री केहीदिनका लागि मात्र पुग्ने जनाइएको छ । अस्पतालकी मेडिकल सुप्रिटेन्डेन्ट डा. संगीता मिश्रका अनुसार हाल नमूना परीक्षण कार्य म्यानुअल्ली हातबाट गरिँदै आएको छ ।
पीसीआरको लागि आवश्यक किट भए पनि स–साना अन्य आवश्यक सामाग्री सकिँदै गएको हुनाले मन्त्रालयमा माग गरिएको उनले बताइन् ।
Copyright © 2019 / 2026 - Junkirikhabar.com All rights reserved
